CLXVIII.

1339, März 23. Frankenstein.

Vergleich des Abtes Sigehard mit Nicolaus Kasmyr wegen des Dörfchens Dörndorf.

Nos Bolko dei gratia dux Slezie et dominus de Furstinberg et Munstirberg omnibus hanc litteram intuentibus recognoscimus, quod Nicolaus Kasmyr noster fidelis per monasterium de Kamencz infeudatus existens ad tempora solummodo vite sue de villula, que Durrendorph dicitur, ut nobis vice dicti monasterii, deserviret, hic tandem occasione eiusdem servitii per hostes memorati monasterii, in spoliis et incendiis rerum diversarum et in equis plurima, ut asseruit dampna recipit, que in dictum monasterium nisus est retorquere. Nos igitur eiusdem Nicolai predicti et religiosi viri domini Syghardi abbatis de Kamencz humilibus et devotis pre­cibus inclinati, consideratis causarum meritis hinc et inde ac habito maturo consilio sapientum eosdem integre concordavimus in hunc modum ita, quod idem abbato, Nicolao predicto ad nostrum consilium quadraginta marcas persolvit et dictus Nicolaus dictam villam Durrendorph coram nobis libere resignavit domino abbati et monasterio memoratis renuntians pro se ac suis heredibus eidem ville et dampnis predictis ac aliis causis quocunque nomine censeantur necnon et omni actioni vel etiam impetitioni, que sibi et suis heredibus in premissis in futurum possent competere quoquo modo. Sed et predictus Nicolaus spopondit nulla incomoda per se vel per alios unquam inferre publice vel occulte predicto monasterio aut bonis ipsius sed ipsum pro viribus et fideliter promovere; denique predicte partes predictam concordiam suis conditionibus in nostra et multorum presentia constituti ratam et gratam per omnia habentes laudaverunt promittentes eandem se inviolabiliter servaturos. In cuius rei testimonium presentes litteras fecimus dari nostri sigilli munimine roboratas. Testes huius sunt domini Rudgerus et Heinricus de Hugwicz, Fridericus Spigil, Arnoldus et Heinemannus de Petirswalde, Johannes Budow et Petrus curie nostre notarii. Actum Frankinstein feria tertia post dominicam Palmarum anno domini M°.CCC°.XXX° nono.

Or. Perg. An Pergamentstreifen hängt das Reitersiegel (2. Art) mit Rücksiegel. Vgl. Frömrich S. 75.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 10, Urkunden des Kloster Kamenz. Hrsg von Dr Paul Pfotenhauer, Breslau 1881.